По драмата во Дебар Маало, каде „порше“ беше паркирно на велосипедска и пешачка патека, газдата си седеше во кафеана, а полицаец не сакаше да го крене пајак, туку се консултираше со нив, конечно се излезе на виделина- Срѓан Керим е газдата.
Срѓан Керим, ексминистер за надворешни работи во Владата на Љубчо Герогиевски и претседател на 62. заседание на Генералното собрание на Обединетите нации во 2007-2008, беше еден од двајцата осомничени во случајот на СЈО за кривични дела за пропаднатата медиумска компанија Медиа принт Македонија (МПМ). Осомничен беше за кривичните дела: лажен стечај, повластување на доверители и злоупотреба на службената положба и овластувањата, за кои се предвидени затворски казни.
Откако од сопствеништвото на МПМ се повлече Орка холдинг на бизнисменот Орце Камчев, Срѓан Керим беше единствениот сопственик на фирмата која ги издаваше дневните весници „Вест“, „Утрински“ и „Дневник“ и магазинот „Теа Модерна“ . Откако Керим и директорката Јана Станисављева го однесоа МПМ во стечај, доверителите останаа со ненаплатени долгови од оваа компанија во износ од над 3 милиони евра. Додека тој беше управител престанаа со печатење весниците, при што беа отпуштени над 300 новинари, печатарски работници и придружни службеници, и овие весници веќе не постојат.
