На најавената посета на Штип на премиерот Христијан Мицкоски, кој најави присуство на како што стои во поканата „отворање на фабриката на странската инвестиција „Магна мехатроникс“ во ТИРЗ“, опозициската СДСМ реагира дека тој „ќе сече лента на фабрика која работи веќе една година“.
„Фабриката на канадската компанија „Магна”, која успешно работи повеќе од една година, денес е искористена за сечење ленти и лажно претставување како нова инвестиција.
Штипјани знаат и паметат дека оваа странска инвестиција беше најавена уште во мај 2023 година , од тогашната влада на СДСМ. Како ќе им објасни Мицкоски на вработените во „Магна”, кои веќе една година секојдневно одат на работа, дека нивната фабрика допрва ќе започне со работа? Ова е само уште еден доказ дека ВМРО-ДПМНЕ нема капацитет да донесе нови инвестиции, нема идеи за економски развој и затоа се обидува да капитализира на работата што веќе е завршена од СДСМ, стои во партиската реакција.
Мицкоски, пред три дена, при посетата на општина Ново Село, најави дека ќе следат нови странски инвестиции, меѓу кои како што рече, „оваа недела почнува со работа производниот капацитет на „Магна“, странски инвеститор во Штип, со нови 500 – 600 вработени, добро платени вработени и со инвестиција од 45 – 50 милиони еврa“. Веднаш потоа СДСМ потсети дека „Магна“ беше најавена уште во мај 2023 година, од тогашниот премиер Димитар Ковачевски и Владата на СДСМ.
На 11 мај на свеченост во ТИРЗ Штип со фрлање лопата беше означен почетокот на изградбата на фабриката на канадската компанија „Магна мехатроникс“.
„По отворањето на фабрика во ТИРЗ Струга за производство и склопување ретровизори, и други технолошки продукти за автомобилската индустрија, каде според бизнис планот на компанијата ќе се вработат илјада луѓе, во ТИРЗ Штип компанијата ќе отвори нова фабрика каде тест производството се планира да започне годинава, а сериското производство ќе започне во првата половина од 2024 година“. Рече Ковачевски“, рече премиерот Ковачевски во своето обраќање (11.05.2023).
