Поради неколку лајкови, позитивни коментари, трендови на социјалните мрежи или за да се докажат пред општеството, многумина се убиени додека правеле селфи на вагони на воз на железничките станици, над кои поминува струја со екстремно висок напон, дури 25.000 волти. Една фотографија пред пет години за малку ќе го чинеше животот Владо Биговиќ (22), жител на Никшиќ, а сега со важна порака открива како изгледало сето тоа!
Владо Биговиќ од Никшиќ не се сеќава на моментот кога ја доживеал несреќата која му го променила животот. Се качил на вагонот, а силен струен удар од 25.000 волти го онесвестил. Кога ги отвори очите, не знаел каде е и што му се случило.
Пет години по несреќата, Владо Биговиќ ја раскажува својата приказна за порталот Млади Никшича.
„Бев целосно изгубен. Кога ми објаснија што се случило, дури тогаш станав свесен за сериозноста на ситуацијата“, се сеќава Владо.
По првичното лекување во болницата во Никшиќ, тој е префрлен во Клиниката во Подгорица, а потоа на Клиниката за изгореници во Белград. Лекарите веднаш му рекле дека животот му е во опасност.
Докторот ми објасни дека имам огромно уништување по телото и дека има големи шанси да не преживеам“, откри Владо Биговиќ.
Инаку, како што Владо откри за РТС во 2020 година, бил со пријателите на железничката станица, се качил на вагон, а високиот напон го исфрлил од возот и му изгорел поголем дел од телото. Три месеци бил неподвижен, затворен на болнички кревет, а болките биле неподносливи.
“Бев буквално инвалид. Постојана болка, неизмерна агонија. Првите два месеци не можев да го видам ни семејството. Кога конечно ми дозволија, татко ми и брат ми ме гледаа низ прозорецот на болницата. Не можев ни добро да ги слушнам, а едвај зборував од исцрпеност и болка”, вели Владо.
Неговиот татко, брат и кум не беа само негови најголеми поддржувачи, туку и негови донатори на кожа – бидејќи повеќе од 50 проценти од неговото тело беа изгорени.
„Тројцата ја донираа мојата кожа. Без неа не знам како ќе закрепнев“, додава Владо.
По три месеци во Белград, еден месец во Подгорица и уште половина година домашно лекување, Владо полека застанал на нозе.
“Кога дојдов дома бев целосно неподвижен. Платив терапевт, работев со него два месеци, а потоа почнав да вежбам сам. По уште два месеци ги направив првите, слаби чекори”, се сеќава Владо.
Иако се уште има проблеми со одењето, Владо не дозволи несреќата да го скрши.
“Тоа не ми го промени премногу животот, освен што на почетокот ми беше тешко. Сè уште работам, излегувам, се дружам. Продолжив понатаму”, позитивен е Владо Биговиќ.
Владо е еден од ретките кои преживеале толку силен струен удар.
Свесен сум за ова и благодарен на Бога, на лекарите и на сите што се бореа за мене“, нагласува Владо, испраќајќи порака до сите млади:
“Бидете внимателни што и да правите во животот. Потребна е само секунда за да се промени целиот ваш живот. И, се разбира, не го пробувајте тоа што јас го пробав”, ја заклучува својата приказна.
