Српскиот премиер во заминување Милош Вучевиќ денеска изјави дека „брановите на протести се можност за опозицијата која сака отцепување на Војводина да стави такви планови на маса“.
Вучевиќ за ТВ Пинк изјави дека „ова прашање не се наметна одеднаш“ и дека оние кои сонуваат за тоа и кои политички се борат за такво сценарио виделе можност по трагедијата од 1 ноември минатата година.
-Брановите протести се нивна можност да ги стават овие проекти на маса. Ова нема врска со трагедијата. Како некој што живее и е роден таму, чувствувам потреба да истакнам дека не е истиот наратив кога ги имаме овие компликации во општеството во Чачак, Ваљево, Ниш,…како што слушаме во Нови Сад. Не го ставаат во прв план, туку многу лукаво и опасно го завиткуваат во целокупното барање, рече Вучевиќ, обвинувајќи некои опозициски политичари и активисти дека планираат отцепување.
Тој посочи дека се подготвува „истото сценарио како што го подготвуваа во Црна Гора и другите делови на поранешна СФРЈ“, пренесуваат српските медиуми.
По масовните протести за смртта на 15 лица при уривање на настрешницата на реновираната железничка станица во Нови Сад, Вучевиќ поднесе оставка на 28 јануари. Војводина е автономна покраина во северна Србија со население од нешто помалку од два милиони. Ова е етнички најразновидниот дел на Србија, дом на околу 30 етнички групи.
