Европската комисија донесе одлука да мобилизира помош за Македонија и Бугарија во справувањето со шумските пожари што ги зафатија двете земји.
Портпаролот на ЕК за хуманитарна помош и справување со кризи, Балаш Ујвари денеска посочи дека со активирање на Механизмот за цивилна заштита на ЕУ, во земјава се распоредени четири хеликоптери и три противпожарни авион од Хрватска, Словенија, Србија и Турција.
За помош во справување со пожарите во земјава се испратени еден хелликоптер од Србија, два хеликоптери од Словенија, хеликоптер и два авиони од Турција и авион кој е дел од противпожарната флота на ЕУ стациониран во Хрватска.
Во Бугарија пак, според Ујвари, се испратени два хеликоптери за гаснење пожари од Чешка, од кои едниот е дел од противпожарната флота на ЕУ.
Подготвени сме да мобилизираме и дополнителна помош. Како што знаете во пресрет на летото направивме значителни подготовки, ангажирајќи над 500 пожарникари, 28 авиони и четири хеликоптери за гаснење пожари распоредени низ цела Европа, додаде Ујвари.
Во врска со оваа одлука на Европската комисија, евроомесарот за управување со кризи Јанез Ленарчич истакна дека ЕУ е обединета во својата поддршка за справување со пожарите, со што се докажува важноста на солидарноста.
– Нашиот брз одговор преку Механизмот за цивилна заштита на ЕУ е од клучно значење за помагање на локалните напори против овие разорни шумски пожари. Остануваме подготвени да обезбедиме дополнителна поддршка доколку е потребно. Шумските пожари не познаваат граници, како ни нашата посветеност да помогнеме, додаде Ленарчич.
Европската комисија соопшти и дека Координативниот центар за одговор при итни случаи на ЕУ продолжува внимателно да ја следи ситуацијата, со цел да може брзо да реагира за испраќање дополнителна помош доколку биде потребно.
Со цел да помогне во справувањето со евентуалните пожари, Европската комисија во пресрет на летото формира флота од авиони и хеликоптери за гаснење пожари и ангажираше пожарника спремни за итна реакции, кои се распордени на неколку локации ширум Европа.
Противпожарната флота на ЕУ се состои од 28 авиони и четири хеликоптери стационирани во 10 земји членки на ЕУ.
Дополнително, 556 пожарникари од 12 земји се стратешки распоредни на клучните локации во Европа, во Франција, Грција, Португалија и Шпанија, кои се подготвени да реагираат во помош на локалните противпожарни единици во справувањето со огнените стихии.
©ММС.мк Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. Услови за превземање
![Loading ... Loading ...](https://mms.mk/wp-content/plugins/wp-polls/images/loading.gif)