Попладнево околу 16 часот се случила сообраќајна несреќа на едно возило на автопатот од Велес кон Гевгелија кај крстосницата Башино Село, над Велес, потврди за МИА портпаролот на велешката полиција Билјана Ѓаковска. Полициски екипи извршија увид, поради што сообраќајот на автопатот од наплатната станица Сопот кон Гевгелија беше пранасочен на регионалниот пат над Велес.
Како што информира за МИА д-р Ќами Амзиу од Службата за брза помош од Велес, кој прв со медицинска екипа бил повикан на местото на настанот, во несреќата има тројца повредени – семејство од кое 43 годишната ќерка – возач има полесни повреди, а со потешки телесни повреди се здобиле нејзините татко кој бил совозач и мајката која седела назад. Сите повредени се вон животна опасност.
Тие по укажаната прва помош веднаш со медицинско возило се препратени на понатамошно лекување во Ургентниот центар на велешката Општа болница.
АМСМ соопшти дека од 17:35 часот е нормализиран сообраќајот на патниот правец од наплатна станица Сопот кон Гевгелија, кај крстосница Башино село
