По повод празникот Цветници, кој традиционално се одбележува во овој возобновен божји храм, црквата „Успение на Пресвета Богородица“ во Дебар, денеска, како некогаш што било, беше преполн со верници, постојани и поранешни жители кои за празникот се тука, но во голем број присуствуваа и жители од други градови на државава.
-Завршувајќи ја душеполезната Велика Четириесетница, благодарение на Свештената Бигорската Обител, пред се на владиката Партениј, заедно го одбележавме празникот на Влегувањето на Господ Исус Христос во Ерусалим – Цветници, како најава за конечниот триумф на Животот над смртта. Ме потсетува на некои поодамнешни години, кога тука живевме многу голем број православни. Од срце им благодариме на Свештената бигорска обител и владиката Партениј, вели Јованка Василевска, врз чии плеќи се надвиснати осум децении.
Со Божествената Архиерејска Литургија, чиноначалствуваше Неговото Преосвештенство, Епископот Антаниски г. Партениј, заедно со Бигорските архимандрити, јеромонаси и дебарскиот свештеник Миле Ангеловски.
За сите дебрани, како што самите велат, денешниот ден е голем ден.
-Верувам дека и ѝ направиме чест на Пресветата Владичица наша Богородица, заради оваа нејзина црква-паметник со големо историско и духовно значење, а им оддадовме чест и благодарност на богољубивите предци, коишто со голема пожртвуваност ни го оставиле ова велелепно и свето наследство што ете сега го гледаме возбновено и во сиот свој сјај, додава Евангелија Грбиќ од Кичевскиот хор Митрополит Козма Пречистански, кој пак, денеска милозвучно пееше на богослужбата, но изведе и неколку каланди во возобновениот трем на храмот.
Црквата „Успение на Пресвета Богородица“ е сместена во населбата Варош, во горниот дел на градот изградена е во 1840 година и е една од најубавите преродбенски цркви.
-Таа е во вистински спомен на духовниот и градителски дострел на нашите предци од тој славен период, имајќи ги предвид и тешките општествени и економски услови и ограничувања. Порано била главен соборен храм на Дебарското архиерејско намесништво и била седиште на Дебарската митрополија. Потврда за тоа е и фактот што и ден денес просторот до црквата ние дебрани го нарекуваме митрополија, вели Душан Казанџиевски претседател на црковниот одбор на дебарската парохија.
Тој денеска од страна на владиката Партениј беше одликуван со орден Претеча заради сите негови заслуги околу историскиот храм.
-Возљубени дебрани, мили браќа, сестри и чеда. Знаете дека минатата година, заедно со малкуте православни дебрани од градот, започнавме да го обновуваме овој свет и славен Храм на Царицата Мајка Богородица. Лани започнавме со нешто малку, но годинава обновивме многу повеќе. Ги реставриравме столбовите, ги променивме распаднатите греди на храмовиот балкон, ја очистивме целата црква и сосема го возобновивме тремот, кој сега е навистина прекрасен. Кога пред два месеца започнавме интензивно да обновуваме и да градиме, доста средства ни пристигаа од нашите Христијани ширум целата наша возљубена Македонија. Во делото, пак, на возобновата најмногу се потруди благочестивиот господинот Душан Казанџиовски од Дебар, чесен и угледен човек од стара дебарска фамилија, еден од малкутемината храбри коишто останаа да живеат тука. Во обновата, исто така многу се потруди и сестра Елисавета од манастирот во Рајчица. Да знаете дека сите што работеа на храмот, секое утро уште пред 5 часот доаѓаа овде, остануваа некогаш и до полноќ, само за да би го завршиле навреме, рече владиката Партениј.
Затоа, додаде, дозволете ми, во оваа свечена прилика, по одлука на советот на старците од Бигорскиот манастир, да го одликуваме нашиот возљубен Душан Казанџиовски со највисокото манастирско одликување – орденот „Претеча“, заради неговите особени трудови, заложби, пожртвуваност и љубов за овој свет и сечесен храм.
– Бездруго, тој неуморно работи и се грижи за Црквата, и да ви исповедам нешто лично – сум го гледал како лее солзи кога црквата пропаѓаше, а го гледам и денес кај повторно плаче, но сега од радост. Овој добар човек го почитуваат сите граѓани од Дебар. Кога и да поминеше низ дебарската чаршија изминатиов период, нашите драги сограѓани, честитите Албанци кои знаат што правиме, му даваа средства, за да ја помогнат обновата на Црквата, па така Душан секојпат се враќаше во храмот со парични даренија. Затоа се молиме и нив Бог да ги благослови. Денеска на Божествената Литургија се помоливме и за сите граѓани на овој град, без разлика на нивната национална припадност, без разлика на нивната вера, оти сите ние сме возљубени деца на Господ, со вдахновеност и радост истакна владиката Партениј.
Благодарност, искажува и сестра Ефимија, до сите дебрани, без разлика на нивната верска или етничка припадност.
-Тука сме со посебно чувство на заедништво и припадност, на благодарност кон Бога и едни кон други заради ова големо дело што во толку кратко време успеавме да направиме да изгледа вака.
Им се заблагодаруваме на сите Дебрани, без разлика на нивната вера или националност, кои несебично ја даваа својата помош во текот на последните 2 месеци откако започнаа активностите на возобнова на храмот, додава сестра Ефимија.
Вредните дебранки за неколкуте стотина прсутни верници подготвија и богата закуска.
