Од оригиналната изјава на Божилов дадена за БНТ, се гледа дека тој изјавил нешто во сосема друг контекст и воопшто не кажал дека Бугарија ќе обвинува Македонци за дојавите за бомби. Божилов зборува за покренување на обвиненија во Македонија за дојавите за бомби во земјава, а тоа го најави и самиот министер за внатрешни работи Оливер Спасовски
Рецензираме пост објавен на социјалната мрежа Фејсбук во кој се вели:
Бугарија ЌЕ ОБВИНИ И МАКЕДОНЦИ за дојавите за бомби кај нив, тврди директорот на Софискиот безбедносен форум.
Во споделениот текст во склоп на постот со наслов: „Бугарија ќе обвини и Македонци за дојавите за бомби кај нив, тврди директорот на софискиот безбедносен форум”, се вели:
Не сите закани ги затвораат училиштата. Работиме на различни верзии, од кои едната е хибридни закани поврзани со Русија, но ќе бидат обвинети и неколку Македонци кои се поврзани со една од политичките партии во РСМ, додаде Јордан Божилов.
Меѓутоа, изјавата која директно му е атрибуирана на Божилов, никогаш не е дадена во таа форма и со таква содржина. Односно Божилов нема изјавено дека Бугарија ќе обвини Македонци за дојавите за бомби кај нив. Според текстот од постот што го рецензираме, изјавата била дадена за БНТ (Бугарската национална телевизија).
Меѓутоа, кога на следниот линк со почеток од 25 секунда ќе се погледне оригиналната изјава на Божилов дадена за БНТ преку видеоврска, се гледа дека тој изјавил нешто во сосема друг контекст и воопшто не кажал дека Бугарија ќе обвинува Македонци за дојавите за бомби кај нив.
И во Северна Македонија се работи на различни верзии. Најнапред имаше информација за хибридни закани, поврзани и со Русија. Таа информација се објави и во Бугарија на една од конференциите кои ги одржавме. Но сега, како што разбирам, ќе бидат покренати обвиненија и за неколку Македонци, македонски граѓани, кои се поврзани со една од политичките партии во Македонија.
Контекстот на дадената изјава е таков, јасно е дека Божилов зборува за состојбата со дојавите за бомби во Северна Македонија, а не во Бугарија. Дека ќе бидат обвинети неколку македонски државјани за дојавите за бомби најави министерот за внатрешни работи, Оливер Спасовски во интервју за Радио Слободна Европа.
Во конкретниот случај, во пренесената изјава на Божилов поради неквалитетен превод направена е грешка и пласирна е дезинформација.
Божилов зборува за покренување на обвиненија во Македонија за дојавите за бомби во земјава, а тоа го најави и самиот министер за внатрешни работи Оливер Спасовски. Не станува збор за тоа дека македонски државјани ќе бидат обвинети за дојавите за бомби во Бугарија. Поради сите горенаведени факти постот кој го рецензираме го оценуваме како невистинит.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
