ММС
Банер за Супер7

Објавено на: 05/11/22 3:08 PM

Секој трет млад човек сака да се отсели од земјава, покажа истражувањето на Агенцијата за млади и спорт

 Квалитетното образование, најважниот фактор за подобрување на квалитетот на живеење во нашата држава и практичната настава , се најголем проблем во образовните институции, а речиси секоја трета млада личност сака да се отсели во друга држава, покажува истражувањето на Агенцијата за млади и спорт спроведено на национално ниво во периодот од јануари до март 2022 година.

Ова истражување, со кое биле опфатени 1.200 испитаници од осумте плански региони, има примарна цел да постави основа и да даде увид во однос на ставовите, перцепциите и очекувањата на младите луѓе во државава.

Резултатите од истражувањето покажуваат дека 68,4 проценти од испитанците имаат негативен став кон образованието, а речиси 30 проценти проблемот го гледаат во наставниот кадар, за кој истакнале дека е неквалфикуван и незаинтересиран. Најголема желба за отселување имаат младите од Источниот регион, а најмала од Полошкиот.

Според податоците, младите сметаат дека квалитетот на живеење може да се подобри преку доброто образовани, можности за вработување и намалување на корупцијата. Младите сметаат дека корупцијата постои секаде и од неа зависат сите области.

– Кога би се намалила корупцијата лесно би можеле да се запишеме на факултет, да се вработиме според струката, но и да живееме во почист град, се посочува во една од изјавите на испитаниците.

На презентацијата присуствуваше и директорот на Агенцијата за млади и спорт, Наумче Мојсоски, кој истакна дека е потребна поголема волја од страна на МОН за задржување на младите да студираат во државава.

– Мојата забелешка до МОН е кога поголемиот број од нашите државјани заминуваат, дајте да препишеме што треба од таму каде што одат, за да ги здржиме.  Предимензионирањето на Скопје по мене е најголем проблем, бидејќи се што направивме направивме во Скопје и образованиот систем и централизирање на сите институции е во Скопје, со што покажавме дека помалку се мисли на внатрешноста. Секако кога нема достапност тоа резултира со заминување во странство. Апелираме дека треба што повеќе се вклучат лица од внатрешноста со што ќе имаме порелевантен образовен процес, изјави Мојсоски.

Според податоците, 30 проценти од младите испитаници сметаат дека немаат доволно можности за развој во државава, додека 33,3 отсто имаат желба за развивање сопствен бизнис, но немаат доволно можности за тоа.

За 24,4 отсто од испитаниците сметаат најдобро е да се бара работа во странство, а за 23,3 проценти од младите приватниот сектор е најдобрата опција за вработување.

Истражувањето освен образованието ги опфаќа и другите области како културата, здравството, младинското учество и локалната младинска работа, квалитетот на живеење, младинското информирање, вработувањето и поддршката пред вработување.

фото: mladi.hr


Доколку преземете содржина од оваа страница, во целост сте се согласиле со Услови за преземање.

Банер за Супер7
1x1