ММС
Банер за Супер7

Објавено на: 01/26/22 4:01 PM

Патници се смрзнуваат чекајќи го возот, никој од Македонски железници не им кажал дека поради бојкот сообраќајот е во прекин

Од 7.00 часот утрово патничкиот и товарниот железнички сообраќај е во прекин, поради бојкот на машинскиот и извршниот персонал во „Железници – Транспорт”.

Како што изјави за МИА Душко Чакаровски, претставник на машинскиот персонал, причина за бојкотот е неисплатениот втор дел од декемвриската плата.

Тој се повика на Одлуката од 2 ноември 2021 година, според која, машинскиот и извршниот персонал нема да ги извршува работите ако платата за претходниот месец не биде во целост исплатена до 25-ти во тековниот месец.

– Се повикуваме на оваа Одлука и поради тоа не ги извршуваме работите. Веднаш ќе продолжиме со работа кога ќе ни се исплати вториот дел од декемвриската плата, нагласи Чакаровски.

Тони Димовски, пак, кој исто така е претставник на машинскиот персонал, кусо одговори дека се во тек „разговори и преговори околу барањето”.

Согласно Одлуката од ноември, машинскиот и извршниот персонал во Железници – Транспорт бара и исплата на материјалните трошоци до 10-ти во тековниот месец.

Прекин на железничкиот патнички и товарен сообраќај имаше и на почетокот на август, како и во ноември 2021 година. Ниту тогаш, ниту денес патниците на кои возот им е единствено средство за превоз и набавка на прехранбени продукти, не беа предупредени од Македонски железници, па некои од нив се уште се на постојките и се смрзнуваат додека чекаат некој да дојде со автомобил да ги превезе до Скопје, а потоа оттаму со автобус до Велес.

– Нема никаква одговорност кон патниците иако МЖ е јавен сервис и работи со пари на граѓаните.Чекаме на станица среде дивина на која нема постојка за да не заштити од дожд, сонце или снег и го очекуваме возот во секој момент. А, возот го нема затоа што никој не ни кажал дека нема да сообраќа тој ден поради штрајкот. И бараме превоз до Скопје, па оттаму за Велес, а тоа чини време, пари и нервоза. Додека ние мрзнеме во 21 век, политичарите се препукуваат кој што направил или не направил, а не разбираат дека студот за сите е ист. Кога ќе почнат повторно да возат, треба да застанеме пред возот и да му речеме, е сега нас не ни се вози и ќе протестираме ненајавено – револтирано рече патникот за ММС одговарајќи на прашања поврзани со студот во незагреаните кинески возови, 48 часа пред да стапи на сила бојкотот на машиновозачите.

О.К.

 


Доколку преземете содржина од оваа страница, во целост сте се согласиле со Услови за преземање.

Банер за Супер7
1x1