ММС
Банер за Супер7

Објавено на: 01/12/22 10:58 AM

Лани чукнаа пет срца од починат донор, 16 пациенти добија бубрези

Минатата година во земјава се направени девет експлантации од починат донор, при што 16 пациенти добија бубрези, петмина срце и кај осум беа трансплантирани коскени ткива. Тоа е значителен напредок во споредба со претходните години, како во полето на трансплантација, така и во делот на подигнување на свеста за органодонорството, соопшти Универзитетската клиника за ортопедски болести.
Лани за прв пат се направени четири експлантации на коскено ткиво од починат донор, што е  значаен исчекор во полето на трансплантационата медицина, и на ортопедијата во земјава. По првата експлантација која ја направи тимот од Клиниката на 17 април, до крајот на годината, како што се нагласува, беа направени уште три експлантации на коскено ткиво од починат донор. На осум пациенти, од кои четворица со малигна болест, им е трансплантирано здраво коскено ткиво, со што значително се подобри нивниот квалитет на живот.
„Ова за сите е голем и значаен чекор. Горд сум и како хирург ортопед, но и како директор на Универзитетската клиника за трауматологија, ортопедски болести, анестезија, реанимација и интензивно лекување и Ургентен центар (ТОАРИЛУЦ), што бевме дел од мултидисциплинарниот тим за трансплантација во земјава. Трансплантацијата значи многу не само од аспект на медицна, туку отвора и една друга димензија на хуманост, човечност и надеж, што во ова тешко време кое го живееме на сите ни е потребно“, вели асс. д-р Александар Трајановски, директор на ТОАРИЛУЦ, во чиј состав е Клиниката за ортопедија.
Интервенциите кај сите осум пациентите кои добија коскено ткиво од починат донор, беа изведени на Клиниката за ортопедски болести од страна на стручните тимови на Клиниката предводени од еминентни хирузи ортопеди. Од почетокот на 2021 година на Клиниката е возобновена и Банката за коскени ткива каде благодарение на Германската амбасада е набавен нов уред за замрзнување на графтовите на многу ниски температури. Сето ова беше предуслов за развој на трансплантацијата на коскени ткива од починат донор.
„Пациентите кои добија коскено ткиво се во најголем дел се млади лица кои имаа сериозни здравствени проблеми. Првата трансплантација е кај млада девојка која има дваесетина години и кој боледува од тешка форма на карцином на коски. Една од опциите кај неа беше и ампутација на ногата. По направената трансплантација на лев дистален фемур, осум месеци по зафатот, нашата пациентка веќе почна да оди“, вели д-р. Милена Богојевска Доксовска, болнички координатор на Клиниката за ортопедија.
Националниот координатор за трансплантација, д-р Маја Мојсова Мијовска постојано го нагласува значењето на органодонорството како предуслов за развојот на еден трансплантациски програм.
„Благодарение на хуманата димензија на семејствата кои се одлучуваат да ги донираат органите од нивните блиски, ние можеме да ја развиваме трансплантацијата во земјава, во интерес на пациентите за кои единствен спас е токму трансплантацијата. Нивната одлука да се донираат органите значи не само хуманост и надеж за пациентите, туку и верба во здравствениот систем, вели д-р Мојсова Мијовска.

МИА


Доколку преземете содржина од оваа страница, во целост сте се согласиле со Услови за преземање.

Банер за Супер7
1x1