ММС

Објавено на: 10/13/21 9:22 AM

Нова иницијатива на АЕТМ: Повик за поддршка за македонските агро производители за пласирање на нивните производи за онлајн продажба

Македонските агро производители ќе добијат можност бесплатно да ги усовршат нивните дигитални вештини, но и да научат како подобро да ги пласираат своите производи на домашните веб платформи за е-трговија, преку јавниот повик кој го објави Асоцијацијата за е-трговија на Македонија.

Оваа активност е дел од иницијативата „Agri E-commerce” којa е поддржанa од Програмата за зголемување на пазарната вработливост (ИМЕ), финансирана од Швајцарската агенција за развој и соработка, а се спроведува од страна на АЕТМ.

Целта на јавниот повик е поддршка на локалните агро производители кои сакаат да ги пласираат своите производи надвор од својата локална околина и сакаат да започнат со нивна продажба со помош на е-трговијата. Со овој повик, Асоцијацијата за е-трговија на Македонија се вклучува во напорите за подигнување на свеста за бенефитите од е-трговијата и зголемување на понудата за е-трговијата во нашата земја.

– „Нашата цел е да мотивираме повеќе агро производители да ги зголемат своите дигитални вештини и да ја искористат е-трговијата како дополнителен продажен канал на своите производи, кој ќе им овозможи да ја зголемат својата продажба и дигитално присуство.“ – велат од АЕТМ.

Јавниот повик е отворен за сите агро производители кои сакаат да ги пласираат своите производи на најпознатите домашни веб платформи за е-трговија, се регистрирани согласно законите во РСМ и ги исполнуваат условите објавени на веб страницата на Асоцијацијата – https://ecommerce.mk/agri-ecommerce/

Одбраните апликанти треба активно да ги следат обуките за развој на дигиталните вештини во времетрање од еден месец, како и насоките на тимот на АЕТМ кој ќе ги води низ процесот за поврзување со домашните платформи за е-трговија.

Аплицирањето на јавниот повик, кое се одвива онлајн на веб страницата на АЕТМ, трае до 20 октомври, по што ќе следи евалуацијата на апликациите од страна на комисија составена од експерти во областа.

ИНФОРМАЦИЈА ЗА УРЕДНИЦИТЕ

Проектот „Agri e-commerce”, кој е поддржан од Програмата за зголемување на пазарната вработливост (ИМЕ) има за цел да одговори на потребите што доаѓаат од веб-платформите за е-трговија за продажба на локално одгледувани агро производи (свежи или преработени) од една страна и да им помогне на локалните земјоделски производители да ги продаваат своите производи преку Интернет, од друга страна, преку едуцирање на агро-производителите за зголемување на нивните дигитални вештини, поврзување и олеснување на соработката помеѓу двете страни.

Јавниот повик е отворен за сите агро производители кои сакаат да ги пласираат своите производи на домашните веб платформи за е-трговија. Категории на производи од потсекторите овошје и зеленчук кои се сметаат за прифатливи во рамки на овој јавен повик се:

  • Свежо овошје и зеленчук
  • Конзервирано/ преработено овошје и зеленчук
  • Мешунки и зрна
  • Засладувачи
  • Маслинки
  • Намази и сосови
  • Природни сокови
  • Џемови и мармалади
  • Путер од јаткасти плодови
  • Зачини
  • Јаткасти плодови и сушено овошје
  • Вино и други алкохолни пијалоци од грозје
  • Безалкохолни пијалоци, ликери, сирупи

Апликантот треба да има најмалку едно вработено лице и треба да исполнува еден од следните критериуми за подобност:

  • да биде правно лице регистрирано во Централниот регистар на Република С. Македонија, во согласност со Законот за трговски друштва или
  • да биде физичко лице производител на прехрамбени производи или оператор од мал обем согласно Законот за безбедност на храна
  • да биде запишан во единствениот регистар на земјоделски стопанства во Министерството за земјоделство, шумарство и водостопанство.

Доколку преземете содржина од оваа страница, во целост сте се согласиле со Услови за преземање.

1x1