ММС

Објавено на: 09/14/21 9:45 AM

Граѓаните се активни на Пописот и покрај негативната кампања од партиите, тврди Симовски

Заклучно со вчера до 20 часот попишани се 512.457 лица, 158.519 домаќинства и 212.464 станови. Владата им се заблагодари на граѓаните за масовниот одѕив кој ја покажал свесноста и одговорноста на секој од нив и очекува пописот да продолжи со предвидената динамика, информираше портпаролот на Владата, Душко Арсовски.

И директорот на Државниот завод за статистика, Апостол Симовски, нагласи дека Пописот 2021 се одвива со посакуваниот интензитет.

– Вчера, попишавме точно 93.235 лица, 29.491 домаќинство и 40.155 станови. Ова се навистина прекрасни податоци, особено што се работи за работен ден, за разлика од претходните кога беа за време на викенд и очекувано беа повисоки, бидејќи населението е дома. Исклучително сме задоволни и од темпото и од работата на попишувачите и се надеваме дека ваквото темпо ќе продолжи и понатаму и без никаков проблем ќе го завршиме пописот во предвидениот рок, изјави Симовски.

Тој немал точна бројка за одбивањата на попишување, но таму каде што имало првично одбивање, одат и разговараат со граѓаните. Симовски потврди дека има негативна кампања и не престанува.

– Таа не престанува. Една политичка партија има кампања за да го спречи пописот. Податоците го покажуваат тоа, граѓаните се активни. Не применуваме никакви санкции се уште и се надеваме дека тоа нема да се случи до крајот на попишувањето, односно дека ќе успееме овие луѓе да ги убедиме дека, онаа пропаганда против спроведувањето на пописот се дезинформации и целта е сосема друга, изјави Симовски и додаде дека не очекува непредвидливи проблеми со технологиите како што се појавија на самиот почеток на попишувањето.

О.К.

 


Доколку преземете содржина од оваа страница, во целост сте се согласиле со Услови за преземање.

1x1