ММС

Објавено на: 09/3/21 5:56 PM

Починаа две деца од Авганистан откако јаделе супа со отровни печурки

Во болницата во Варшава почина уште едно момче од Авганистан од евакуирано шестчлено семејство, кое беше отруено на 24 август во центарот за бегалци во Подкова Лесна Дембак, во близина на Варшава, откако сами си подготвиле супа од отровни печурки. Во август, Полска евакуираше 1.021 лице од Авганистан, соработници на полски војници и дипломати во мисијата во Авганистан и членови на нивните семејства.

На шестгодишниот Мустафа не му помогна ниту итна трансплантација на црн дроб, а Здравствениот центар за деца објави дека на него, како и на неговиот брат, петгодишниот Али, му била дијагностицирана мозочна смрт поради сериозно оштетување од токсините од печурка “зелена мува”.

Нивната сестра (17) од семејството на НАТО соработници во Авганистан, кои беа евакуирани во Полска, а која исто така беше отруена од супа од отровни печурки собрани на теренот за бегалскиот центар, порано беше пуштена од болница. Таткото од семејството рекол дека зготвиле супа од една од најотровните печурки во Полска затоа што не знаеле дека печурката е отровна, и биле гладни бидејќи наводно примале два оброка дневно.

Центарот за бегалци го објави менито од таа недела, што покажува дека имало три оброци дневно.

„Имам впечаток дека ова е несреќна случајност. Тие се уште беа во карантин и не можеа да излезат од отворениот центар за да купат нешто за јадење. Има бегалци од различна националност, Чеченци, Сомалијци, различни култури, различни кујни. Тешко е да се подготви јадење што ќе одговара на секого. Сепак, износот издвоен за храна за бегалците треба да биде поголем “, изјави Каролина Червињска од Полскиот миграциски форум, кој исто така им помага на бегалците во тој центар, за полскиот весник Газета Виборца.

Полското обвинителство започна кривична истрага за негрижа на авганистанско семејство, родители и четири деца, од кои две починаа, а бегалските центри апелираат деновиве до бегалците да не собираат печурки што не ги познаваат добро.

Полска во август евакуираше 1.021 лице од Авганистан, соработници на полски војници и дипломати во мисијата во Авганистан и членови на нивните семејства, и тие во моментов се во карантински центри за бегалци.

Заедно со нив, Полска евакуираше и прими 500 преведувачи и соработници на други сојузници на НАТО во Авганистан за три месеци.

Извор: Нова.рс


Доколку преземете содржина од оваа страница, во целост сте се согласиле со Услови за преземање.

1x1