ММС

Објавено на: 09/1/21 3:45 PM

Македонските одбојкари вечерва против Финска го отвораат Европското првенство

Македонската одбојкарска репрезентација вечерва од 18 часот против кодомаќинот Финска во Тампере го започнува својот настап на Европското првенство.

Во своето второ учество на континенталните собири, „црвено – жолтите” по втор пат во премиерниот натпревар ќе играат против финските одбојкари, кои на ЕП 2019 во неизвесен дуел победија со 3:1.

– Финска не е подобра репрезентација од нас, но сè ќе зависи од нашата верба, храброст и зрелост. Го гледав првиот натпревар со нив и навистина загубивме на ситни работи, а во нашата игра има можност за напредок уште 20 или 30 проценти. Доколку успееме да се подобриме за 10 проценти, мислам дека ќе ги победиме, изјави капитенот на македонската одбојкарска репрезентација Никола Ѓорѓиев спроти вечерашниот дуел.

Во второто коло македонските одбојкари ќе играат против Холандија (петок, 20 часот), во третото против Турција (недела, 14 часот), додека противник во четвртото коло ќе им биде репрезентацијата на Шпанија (6 септември, 17 часот). Натпреварите од групната фаза македонската репрезентација ќе ги комплетира на 8 септември против Русија со почеток од 17 часот.

Европско првенство, 32. по ред, ќе се игра во Финска, Естонија, Полска и Чешка, а финалето е закажано за 19 септември во Катовице.

МИА

 

 


Доколку преземете содржина од оваа страница, во целост сте се согласиле со Услови за преземање.

1x1