ММС

Објавено на: 08/14/21 3:27 PM

Пожар го зафати Горно Мелничани, зафатени околу 10 хектари стеблеста букова шума

Вчера околу 17:00 часот избувна пожар во атарот на селото Горно Мелничани, општина Центар Жупа, по што е ставен под контрола, но и понатаму постои опасност од негово активирање, изјави за МИА, Џетан Мифтароски, командир на дебарската Територијална противпожарна единица.

Додава дека поради тоа пожарникари, како и вработени од подружницата на „Национални шуми“ остануваат на терен.

– Пожарот зафати голема површина со високостеблеста букова шума, односно околу 10 хектари. Според првичните сознанија пожарот најпрво се појавил во бараката каде што престојувале дрвосечачи, кои во моментот не биле тука и се проширил. Во гаснењето беа вклучени и вработени во подружницата на „Национални шуми“, полициски службеници, вработени во општина Центар Жупа, заедно со градоначалникот Аријан Ибраим, изјави Мифтароски.

Според него во изминатите денови од ова седмица имале десеттина интервенции во гаснење на пожари на отворен простор, но со многу мала површина и незначителна материјална штета.

Како што информираше Стефан Димоски, портпарол на Секторот за внатрешни работи од Охрид, во врска со овој настан, полициските службеници лишиле од слобода осум лица, од нив шест од Куманово и две од Република Албанија.

По консултација со Јавен обвинител од ОЈО Дебар, тие се задржани во полициска станица, а службен разговор е извршен со уште едно лице од селото Броштица, вработено во „Национални шуми“. По документирање и на овој случај ќе биде поднесен соодветен поднесок.

МИА


Доколку преземете содржина од оваа страница, во целост сте се согласиле со Услови за преземање.

1x1