ММС

Објавено на: 08/11/21 2:32 PM

„ЕДИП Коментари“ го враќа Игор Киров на штипската сцена

Комплексна претстава, работена по Европски стандарди ќе биде претставена утре премиерно во Домот на Културата во Штип. Станува збор за авторски проект на Драгана Милошевска Попова и Игор Киров по мотиви од „Едип” на грчкиот автор Софокле.

Јазикот на Едип во денешницата ќе го говори актерскиот тим составен од: Ефтим Трајчов Ѓаурски, Анѓелка Нашкова, Пеце Ристевски, Марија Минчева Андонов и Милорад Ангелов.

„ЕДИП Коментари” во режија на Драгана Милошевска Попова ќе прикаже едно ново, поразлично и оригинално видување на митот за Едип утре во 21.00 часот.


Светски познатиот штипјанец, кореографот Игор Киров, по скоро 30 години се враќа на матичната сцена и со гордост го најави својот проект.

За ММС.МК изјави дека работеле напорно и интензивно, а актерскиот тим го гледаме во поинаква форма со актерска глума, танц, енергија која се претопува во емоција и техника на игра со музика.

На нашето прашање дали проектите врзани за штипската сцена завршуваат со овој проект, Киров кажа:

„Имам многу планови, но ситуацијата со пандемијава е таква каква што е, па според она што ќе се случува ќе зависи и нивната реализација. Има преговори за проекти во Скопје, Сараево, пред мене се проекти во Германија … Планови постојат, но да сме живи и здрави!“ – рече Киров.

Штипската публика со нетрпение ја очекува утрешната премиера и светската сценска енергија која и те како ќе ни пружи културно освежување.

 

А. П


Доколку преземете содржина од оваа страница, во целост сте се согласиле со Услови за преземање.

1x1