ММС

Објавено на: 07/19/21 2:52 PM

Охриѓанка барана со меѓународна потерница уапсена на албанско-македонската граница

Граничната полиција на преминот Тушемиште – Свети Наум, на албанско –македонската граница, уапсила македонска државјанка барана со меѓународна потерница, издадена од норвешките власти.

– Благодарение на соработката на Интерпол Тирана со Интерпол Осло, Норвешка и граничната полиција, уапсена е А.М.(35) жителка на Охрид, Северна Македонија, заради екстрадиција во Норвешка. Службите на граничната полициска станица Тушемиште, на влезот во Република Албанија, при контрола на документите утврдија дека станува збор за лице барано со меѓународна потерница – соопштија од полицијата.

Оттаму информираат дека за охриѓанката била распишана меѓународна потерница поради „семејно насилство и киднапирање” и оти Интерпол Тирана ја продолжува постапката за нејзина екстрадиција во Норвешка.

На 11-ти месецов на граничниот премин Ќафасан, на албанско-македонската граница кај Струга, при влез на албанска територија, уапсен беше Ф.В. 39 годишен, жител на село Велешта, Струга. Против него  шестиот федерален кривичен суд во Рио де Жанеиро, Бразил, издал налог за апсење за кривично дело „трговија со наркотици”.

Три дена подоцна на  преминот Морина, пак, на албанско – косовската граница, кај Кукс,  службите на албанската гранична полиција, го уапсија Џ.Ф. (38), жител на Скопје, баран со меѓународна потерница, за кривични дела „кражби” и „трговија со наркотици”, распишана од белгиските власти.


Доколку преземете содржина од оваа страница, во целост сте се согласиле со Услови за преземање.

1x1