ММС

Објавено на: 07/10/21 11:48 AM

За првпат во земјава спроведена постапка за стимулација на нервот вагус: Се очекува подобрување на животот на пациентите со епилепсија

За првпат во јавното здравство во нашата земја, денеска се направи една интервенција што означува почеток во работа во една сосема нова сфера во неврохирургијата и неврологијата. Се работи за постапка за стимулација на нервот вагус, која се користи за подобрување на квалитетот на животот на пациентите кои имаат епилепсија – изјави министерот за здравство Венко Филипче при денешната посета на Клиниката за неврохирургија.

Оваа постапка ќе се користи кај пациенти кај кои терапијата нема никаков ефект и кои имаат многу чести епилептични напади и не можат да ги вршат нормалните животни функции.

– Со оваа метода се намалува и фреквенцијата и силината на нападите и сега оваа група пациенти има сериозна шанса да се врати во нормалниот живот, нагласи Филипче.

Во земјава има околу 15 илјади пациенти кои имаат епилепсија, а 30 проценти не реагираат на терапија.

– Тоа значи дека имаат толку чести напади, што едноставно не може да извршуваат нормални животни функции. Еден од пациентите, има по десетина напади во ден, а сега со оваа стимулација на нервот вагус, што минува во вратот и тука се поставува електрода, импулсот оди назад и на тој начин се смирува мозочната активност, односно се редуцираат нападите. Оваа метода во изминатите две децении интензивно се работи и е ново поле во невро науката, појасни Филипче.

Тој изрази благодарност до д-р Вашчаревиќ од Институтот за неврохирургија во Белград, кој заедно со останатиот тим на Клиниката, директорот на Клиниката за неврохириргија во Скопје, Владимир Рендевски и сите колеги кои ќе работат на ова поле.

Директорот на Клиниката за неврохирургија, Рендевски посочи дека ова претставува нова врата во функционирањето и напредокот на Клиниката, од што бенефит ќе имаат сите пациенти.

– Сите пациенти со тешки форми на епилепсија, кои претходно одеа на лекување во странските центри, отсега ќе може да бидат тука и оперативно третирани и секако понатаму, во соработка со Клиниката понатамошниот нивни третман ќе биде правен во нашите простории, што ќе биде големо олеснување за нив, изјави Рендевски.

 

МИА


Доколку преземете содржина од оваа страница, во целост сте се согласиле со Услови за преземање.

1x1