ММС

Објавено на: 07/8/21 12:13 PM

Засега нема рестриктивни мерки на границите

Засега нема најава за рестриктивни мерки на границите. За конкретни наши евентуално препораки ќе разговараме оваа недела на состанот на Комисијата за заразни болести. Тоа што се’ уште не се знае, а чекаме да излезат публикации се информациите кои ни требаат во врска со тежината на клиничката слика односно да видиме како се однесува овој вирус кај луѓе кои се или не се вакцинирани. Затоа акцент ставаме на вакцинацијата – посочи денеска министерот, Венко Филипче кој повторно апелираше граѓаните да се вакцинираат бидејќи како што рече, по оваа мутација може да дојде некоја друга.

„На Комисијата ќе се зборува за тоа дали треба нешто да се препорача во однос на критериумите за влез на границите, иако гледаме дека во многу земји во регионот покрај тоа што имаат некакви рестриктивни мерки, како во Грција на пример, има пораст на заболени“, додаде Филипче.

Според него, треба да се препорачаат мерки кои треба да бидат ефикасни.

„Во овој момент ситуацијата е мирна, нема голем број прегледи по болниците за пациенти суспектни на ковид-19, така што во овој момент некакви рестриктивни дополнителни мерки што се однесува до функционирањето не се препорачани“, рече Филипче, одговарајќи на новинарски прашања по посетата на болницата „Св. Еразмо” во Охрид по повод реконструкција и опрема за Центарот за физикална терапија.

Одговарајќи на новинарско прашање тој рече дека со кредитот од Светска банка целосно ќе се опреми болницата „Св. Еразмо” во Охрид, како и Ургентниот центар во Тетово и новото крило во болницата во Струмица.

МИА


Доколку преземете содржина од оваа страница, во целост сте се согласиле со Услови за преземање.

1x1