ММС

Објавено на: 07/6/21 10:53 AM

Над 150 жени абортирале со апчиња на ГАК

Од почетокот на годината вкупно 154 жени имале медикаментозен абортус на Клиниката за гинекологија и акушерство во Скопје. За разлика од нив кои абортирале со апчиња, околу 90 пациентки имале стандардна оперативна процедура. За ова денеска информираа министерот Венко Филипче и директорката на ГАК, Викторија Јовановска.

„Тоа значи дека кај 150 жени согласно индикацијата е избегната оперативната процедура и давањето на анестезијата, што е една значајна придобивка поради тоа што се избегнуваат сите ризици коишто се поврзуваат со оваа интервенција“, појасни Филипче.

Инаку, од денеска во функција е и целосно реновираната ургентна амбуланта на оваа Клиника. Амбулантата дневно опслужува 50-60 жени коишто доаѓаат за различни ургентни состојби во областа на гинекологијата. Опремена е со нови ЦТГ апарати, односно апарати со коишто се регистрира срцевата активност кај бебињата, нов стол и сега амбулантата има пријатен амбиент да ја пружа соодветна здравствена услуга.

„Клиниката за гинекологија и акушерство е институција којашто во целокупниот изминат период најпрво го менаџираше третманот на жените, родилките коишто беа позитивни на коронавирусот со целосно изолирани делови во делот на третманот, интензивното лекување и операциони сали. Се истакнуваат со години наназад со својата експертиза, знаење и менаџирање на целокупниот процес што се однесува на мајчиното здравје, здравјето на бебињата од најраните денови, првите денови на животот што се манифестира како еден успех препознаен и од меѓународни институции, а тоа е преполовувањето на новороденечката смртност за период од две години“, додаде Филипче при денешната посета на Клиника.

 

В. Ми


Доколку преземете содржина од оваа страница, во целост сте се согласиле со Услови за преземање.

1x1