ММС

Објавено на: 07/1/21 7:28 AM

Бесплатно паркирањето за возилата со српски и турски регистарски таблички во Охрид

Советот на Општина Охрид донесе одлука за време на оваа сезона туристите од Србија и од Турција што ќе летуваат во градот да бидат ослободени од наплатата за паркирање.

Станува збор за одлука што ја најави градоначалникот на Охрид Константин Георгиески за време на неговата посета на Белград, а како благодарност до Република Србија за поддршката на државата во процесот на имунизација на македонските граѓани против Ковид-19.

Согласно одлуката, сите туристи што во Охрид ќе пристигнат со сопствени возила, а се со регистарски таблички од Србија односно Турција нема да плаќаат паркирање на јавните површини и паркиралишта во градот со кои стопанисува ЈП „Билјанини извори“. За туристите од Србија претходно беше најавено дека ќе бидат ослободени и од наплата на влез во повеќе културно-историски локалитети и објекти во Охрид.

На вчерашната седница Советот уште ја разгледа и усвои информацијата за оценката на перформансите на јавните расходи и финансиската одговорност на Општина Охрид, а следеа и одлуки за статутарна измена на Статутот на ООУ „Св. Климент Охридски“, за продолжување на работното време на угостителските објекти, како и одлука за измена на годишниот план за вработување на Општина Охрид.

МИА


Доколку преземете содржина од оваа страница, во целост сте се согласиле со Услови за преземање.

1x1