ММС

Објавено на: 06/18/21 6:55 PM

Како Ем Вандера стана скопска снаа? – Како љубовта од Кенија преку Тајланд ја донесе во Македонија

По потекло е од Кенија, но љубовта ја донесе во Македонија, и сега како што вели се чувствува како Македонка. Полека го совладува македонскиот јазик, а од нејзината свекрва учи да ги подготвува најдобрите македонски јадења. Македонија сега е нејзиниот дом. Ем Вандера две години е во среќен брак со Македонец. Како што таа раскажа за ММС, се запознале на интернет, почнале да се допишуваат, за по некое време Мики да ја посети во Тајланд и од тогаш се раѓа нивната љубов, која уште еднаш покажа дека нема граници. Не крие дека кога доаѓала тука се плашела како ќе биде прифатена од околината, но неговите родители ја пречекале со раширени раце, и како што вели, ја сакаат како нивна ќерка. Сега уживаат во најубавата улога во животот, радувајќи се на малата Дариа. Омилено место и е Матка, го сака Скопје како град, но кога сака да се одмори, најдобриот избор за неа е Охрид.

-Живеам во Македонија веќе 2,5 години. Секако љубовта ме донесе во оваа прекрасна земја. Се вљубив во многу убав, интелигентен, паметен, сакан и грижлив човек. Сè започна со едно едноставно „здраво“, кое не одведе до бескрани слатки разговори што траеја дење и ноќе. Работев во Тајланд како наставник во средно училиште кога започнавме да комуницираме додека тој беше во Скопје. Во одреден момент, престанавме да комуницираме скоро 4 месеци, поради стравот дека почнуваме да се заљубуваме, а сепак бевме толку оддалени. После 4 месеци, тој повторно ми испрати порака и оттогаш ние никогаш не престанавме да комуницираме се додека тој не дојде во Тајланд во декември 2017 година, тоа беше неговата прва посета и тоа беше почеток на нашата вечна приказна. Дојдов во Македонија во 2018 година во ноември, откако се свршивме со сега мојот сопруг во мај при мојата прва посета на Македонија. Потоа се венчавме во јануари 2019 година и ќе живеевме среќно засекогаш.

Кога свати дека тој е вистинскиот за тебе?

-Како што кажав, го запознав мојот убав, интелигентен, паметен, сакан и грижлив сопруг на Инстаграм.  Ние сме заедно веќе  четири години. Секој секогаш може да каже дали тој или таа е вистинскиот/ката. Но, за мене, знаев дека имаме вистинска работа уште од првиот ден кога погледнав кон него на аеродромот Суварнабхуми во Тајланд. Тој беше истиот човек со кој разговарав по телефон со месеци. Никогаш не се чувствував толку безбедно и сакано како што се чувствував кога се сретнавме за прв пат и обратно. Се сеќавам дека плачев на аеродромот кога тој се враќаше во Скопје после двонеделната посета. Хахахаа. Оттогаш знаевме дека сакаме да бидеме заедно и никогаш да не испуштиме.

Со оглед на тоа дека доаѓавте во нова средина, дали се плашевте од тоа како ќе бидете прифатени тука, од неговите родители и дали некогаш сте се соочиле со расизам? 

-Секако кога ќе се преселите на ново место, тоа е застрашувачко чувство. Не можете да престанете да се прашувате како луѓето ќе ве пречекаат, и дали воопшто ќе ве прифатат. Тоа беше и во мојот случај. Свекорот и свекрвата ме пречекаа со раширени раце. Се чувствувавме како да се познаваме со нив многу долго време. Секој околу мене ме направи да се чувствувам дека припаѓам тука. Секако дека понекогаш се чувствував како обичен посетител, затоа што многу ретко може да се забележи африканско лице на скопските улици. Тука живеат многу малку Африканци, па во одреден момент може да се чувствувате како луѓето да зјапаат во вас, што е разбирливо во овој случај.

Јас всушност се исплашив кога одев да ги запознаам неговите родители. Продолжував да размислувам како ќе ме гледаат, како ќе ме пречекаат, и дали ќе го прифатат она што го имаме. Тоа беше страшно и возбудливо искуство во исто време. Родителите на Мики беа толку среќни и возбудени што ме запознаа кога дознаа за нашата врска. Двајцата ја сакаат и ја обожаваат африканската култура и едвај чекаа да поминат повеќе време со мене. Тие се заљубија во мене првиот пат кога ги запознав. Свекрвата и свекорот ми се една од најдобрите работи што ми се случиле во мојот живот. Тие ме сакаат, ме штитат и ме третираат како ќерка што никогаш ја немале. Нивната љубов кон мене е огромна. Дозволете ми само да кажам дека сум благословена што ги имам во мојот живот. Тие ме викаат Емче. Хахааа… Од друга страна, моите родители во Кенија беа толку возбудени што го запознаа Мики кога им кажав за нас. Мајка ми ми велеше дека тие ќе го прифатат секој оној во кого ќе се заљубам се додека ме третира и ме сака правилно. Тие исто така беа возбудени што го запознаа затоа што тој е единствениот човек што некогаш сум им го претставила. На кратко, според родителите на Мики и моите, нашата среќа им е најважна. Тие ја обожаваат нашата врска и секој ден се возбудени што учат различни работи од двете култури. Но, за жал, расисти има насекаде низ светот. Расизмот го создаваат родителите кон своите деца, ги воспитуваат да бидат расисти. Никој не се раѓа расист сигурно. Неверојатно е што луѓето од сите раси ги отворија очите и се здружија заедно да се борат против оваа болест како човечка раса и не како црни, бели или азиска раса. Морам да признаам дека мнозинството Македонци се луѓе со отворен ум, така што овде не сум доживеала расизам во толкава мера.

Сега сте веќе горди родители на малата Дариа, колку ти се промени животот откако стана мајка?

-Дариа е целиот наш свет. Таа е нашето мало сонце дури и во тажен ден. Да се биде мајка и татко носи нови одговорности, вашиот живот се менува засекогаш затоа што благосостојбата на ова бебе е во ваши раце. Дарија ми даде цел во животот. Да се биде мајка е бесценето, и тоа нема да го заменам за ништо на овој свет. Тоа ме промени како личност позитивно, сега гледам на работите на поинаков начин, јас сум поодговорна отколку што бев и на животот му дава ново значење. Само да кажам дека да се биде родител доведе до наше воздигнување во секој поглед и ние сме толку среќни што ја имаме. Таа е вистинскиот производ од нашата љубов што ја споделуваме јас и мојот сопруг.

Дали ти се допаѓа македонската кујна? Дали научи да готвиш традиционални македонски јадења и колку македонската кујна се разликува од кујната во Кенија?

-Ммм … Само ќе кажам дека Македонија е една од земјите со најдобри јадења. Не можам дури и да изберам кој ми е омилено јадење. Македонската храна е вкусна и многу здрава. Јас сум заљубена во вашата кујна. Свекрва ми Блага, сигурно е еден од најдобрите готвачи овде. Таа ме размазува и ми готви различни видови јадења и јас не можам да престанам со јадење ! Десертот ви е неверојатен, мојот свекор има навика да ни прави различни видови македонски десерти. Мојот омилен специјалитет во моментот е тикварник, секако природна, без додадени шеќери и е толку вкусен. Сакам и пита исто така, подготвена со месо или сирење и зеленчук, толку е вкусно. А исто така сакам тавче гравче. Има разлика во начинот на готвење овде во Македонија во споредба со Кениските рецепти. Јас ги сакам петоците затоа што луѓето овде во Македонија готват тавче гравче во петок. Сепак, не треба да јадете многу, зошто можеби ќе „прдите“ цел ден. Хахахахах. Почесто готви мојата свекрва, така што јадеме заедно како семејство. Верувај ми ги готви најдобрите македонски јадења како во хотел со 5 sвезди. Мики сака кога му правам тортили, тие му се омилени. Иако морам да признаам дека македонските јадења се толку вкусни и многу здрави. Мајка му ме учи како да правам различни видови јадења и засега ми оди многу добро. Има толку многу разлики помеѓу кениските и македонските јадења. Има толку многу јадења што ги подготвуваме во Кенија, што Македонците не ги подготвуваат и обратно, а исто така имаме храна во Македонија слична на кениската, но имаат различен вкус заради различните начини на готвење и зачините.

Дали поддржувате доење на јавни места? За ова се води дилема дали треба или не. Кое е вашето мислење?

-Да, јас 100% го поддржувам доењето на јавни места. Секој има свое мислење за доењето во јавност. За луѓето треба да биде нормално доењето на јавни места и да ги гледаат градите како млеко потребно за бебиња кога мајката ги храни наместо да се сексуализира тоа. Ексклузивното доење е најдобра исхрана за сите новороденчиња и доенчиња. Мајките треба да можат да дојат, кога бебињата ќе посакаат и на било кое место. Јас лично имам прекривка што ја користам кога сум во јавност и сакам да го нахранам бебето, не дека ги изложувам брадавиците јавно. И покрај се тоа е една од најголемите фази во животот на човекот и ние треба да го почитуваме тоа.

Дали се навикна на животот тука и колку ти недостига Кенија?

-Да, се прилагодив овде и се чувствувам како Македонка. Секогаш е тешко на почетокот кога ќе се преселите во ново место поради различниот животен стил, јазичните бариери, временските услови и многу други работи. Го научив и сè уште го учам македонскиот јазик полека, полека. Досега можам добро да комуницирам со локалното население овде. Македонија е мала убава земја полна со чуда, сè уште го истражувам и го сакам секој дел од неа. Кенија многу ми недостасува. Ми недостигаат моите пријатели, семејството, храната во основа сè, секој ден, но како што минуваат времињата, се навикнувате на тоа чувство. Секако, домот секогаш е најдоброто место, но сега Македонија е мојот дом и така тоа го чувствувам, омажена сум овде, па така целиот живот ми е тука. Како што е изреката „дом е таму каде што ти е срцето“. Мило ми е што сум среќна и овде во Македонија.

Кои места во Македонија најмногу ти се допаѓаат и зошто?

-Имам толку омилени места во Македонија. Мислам дека малата, но прекрасната Македонија е земја на природни убавини и атракции како реките, планините, водопади, диви животни и многу повеќе. Омилено место ми е Матка. Тоа е скриено богатство во Скопје.

Матка е толку смирувачка, особено кога сакате да побегнете од сè и само да бидете во мир, со кајак опкружен со огромните карпи и шумата и водата. Леле! Го сакам Охрид затоа што е богат со македонска култура, неговите продавници, храната, црквите и плажите наоколу. Тоа е најдоброто место за одење ако сакате да се одморите од Скопје. Го сакам Скопје како град. Скопје е одличен град за да се шетате и да најдете интересни случајни места. Има различни неверојатни места за посета, како старата чаршија, каде што можете да најдете уметнички галерии, музеи ресторани  и многу повеќе. Покрај тоа, јас го сакам ноќниот живот во Скопје, има неверојатни ноќни барови и клубови, многу места за избор. Исто така, ги сакам моите ноќни излегувања со пријателите во летните клубови како едни од моите омилени ноќи. За крај,  Водно е неверојатно место ако сакате да вежбате како мене. Понекогаш возиме велосипеди до Водно, седиме и едноставно уживаме во сонцето. Водно е многу близу до градот, така што ќе можете да имате и подобар поглед на целиот град.

Моника П.Насковска


Доколку преземете содржина од оваа страница, во целост сте се согласиле со Услови за преземање.

1x1