ММС

Објавено на: 06/2/21 3:52 PM

Пронајдено тело на давеник во Поликастро, ќе се утврдува дали припаѓа на исчезнатиот инспектор Минов

Во Поликастро, Република Грција пронајдено е тело на давеник, а ќе се прави и ДНК анализа за да се утврди со сигурност дали припаѓа на исчезнатиот инспектор Илија Минов, објави Основното јавно обвинителство Гевгелија.
Како што објави телевизија Нова 12 денеска побарале информација од ОЈО Гевгелија, во врска со случајот на исчезнувањето на инспекторот во УЈП Гевгелија, Илија Минов. Како што е познато, 59-годишниот Минов последен пат беше виден во утринските часови на 29 март 2021 година облечен во зелена јакна, плави фармерки, црни кондури и шалче кафеаво со црни риги, а неговиот автомобил беше пронајден на брегот на реката Вардар. Од страна на ОВР Гевгелија тогаш беа преземени сите расположливи мерки и ресурси за пронаоѓање на телото со вклучување на хеликоптер, кучиња трагачи и нуркачка екипа од специјалната единица на МВР но за жал со негативен резултат. Преку Интерпол за случајот беше известена грчката полиција и сите служби на граничните премини Богородица и Евзони кои исто така беа вклучени во потрагата по исчезнатиот гевгеличанец.
Пред три недели од страна на Интерпол било добиено известување дека во Република Грција, во Поликастро, во водите на реката Вардар било пронајдено тело на давеник, кое е можно да му припаѓа на исчезнатиот Илија Минов, информира за телевизија Нова ОЈО Гевгелија.
Од страна на неговата сопруга, која веднаш заминала за Поликастро, било извршено препознавање на делови од облеката и обувките, а кои му припаѓале на нејзиниот сопруг, исчезнатиот Минов.
Но, како што информираат од ОЈО Гевгелија , за да се утврди дека се работи за Илија Минов, потребно е по меѓународните протоколи, преку нашето Министерство за правда, да се направи споредбена ДНК анализа, за да со сигурност може да се потврди дека се работи за телото на исчезнатиот Илија Минов.
Извор: Телевизија Нова

Доколку преземете содржина од оваа страница, во целост сте се согласиле со Услови за преземање.