ММС

Објавено на: 04/17/21 8:11 PM

Му дадов на син ми бубрег, кој траеше 18 години, а потоа откажа- По трансплантацијата Блажо од Кавадарци се чувствува добро

Семејството Сапунџиеви од Кавадарци вечерва преку изјава за МИА се заблагодари за донираниот бубрег за нивниот 28-годишен син Блаже. Мајката Форка рече дека сочувствуваат со семејството на младата девојка Верица Белчовска, која загина во сообраќајна несреќа, но изрази благодарност за хуманиот гест да ги подарат органите кои некому многу му значат.

– Трансплантацијата помина успешно. Добар е. Не не пуштија да го видиме, но не инсистиравме, важно е да е се во ред со него, докторите најдобро знаат како треба, рече мајката.

Таа појасни дека нејзиниот син одамна имал проблеми со здравјето, а нивна најголема желба била тие проблеми да се надминат.

-До деветгодишна возраст, пет години беше на дијализа. По деветтата година, јас му дадов еден мој бубрег. Мојот бубрег траеше 18 години и после тоа откажа. Повторно беше една ипол година на дијализа, раскажа мајката со многу емоции.

Со денешната трансплантација, едниот бубрег го доби ова момче, а другиот беше трансплантиран кај 40-годишен пациент.

– Многу ми е жал за девојчето кое многу младо загинало во сообраќајна несреќа. Судбината сакала на ваков начин да ги поврзе нашите две семејства. Засекогаш ќе бидеме благодарни за овој хуман гест, а Верче ќе продолжи на некој начин да живее преку нашиот Блаже и преку другите на кои им се донираат нејзините органи, изјави мајката на Блаже Сапунџиев.

Дека се чувствува добро на својот Фесјбук  профил напиша и самиот Блажо и се заблагодари на семејството на Верица.

-Огромна благодарност до фамилијата. Трансплантацијата ми е успешна, напиша Блажо објавувајки фотографии од трансплантацијата .

 

Ogromna blagodarnost do familijata
Tranplsntacijata mi e udpesgns https://m.facebook.com/story.php?story_fbid=10215827175150820&id=1788230876

Posted by Blaze Sapundziev on Saturday, April 17, 2021


Доколку преземете содржина од оваа страница, во целост сте се согласиле со Услови за преземање.