ММС

Објавено на: 04/14/21 9:33 AM

Продолжува потрагата по исчезнатиот Илија Минов

Во договор со ОВР Гевгелија, градоначалникот Сашо Поцков покрена иницијатива да продолжи потрагата по гевгеличанецот Илија Минов (59) кој исчезна на 29 март 2021 година, во која ќе бидат вклучени повеќе човечки ресурси кои би помогнале во пронаоѓањето на својот сограѓанин кој исчезна на 29 март.

На денешниот состанок беше договорено потрагата да продолжи утре во 10 часот и во неа да бидат вклучени доброволци, претставници од ОВР Гевгелија, Дирекцијата за спасување и заштита, Општина Гевгелија, Центарот за управување со кризи, ТППЕ Гевгелија, Шумското стопанство ,,Кожуф“ јавното комунално претпријатие, риболовното друштво ,,Акваспорт“ и двете планинарски друштва од Гевгелија.

Поделени во групи, трагачите ќе ги пребаруваат двата брега на реката Вардар, до грчката граница, во должина од седум километри.

– Од страна на ОВР Гевгелија до сега во потрагата се преземени сите расположливи мерки и ресурси со вклучување на хеликоптер, кучиња трагачи и нуркачка екипа од специјалната единица на МВР но за жал со негативен резултат. Отежнувачка околност беше и покаченото ниво на водата на Вардар кое сега веќе е намалено за 1,5 метри така што во тек е и пребарување со дрон по речното корито, рече Антонио Карапеев, началник на ОВР Гевгелија.

Преку Интерпол за случајот е известена грчката полиција и сите служби на граничните премини Богородица и Евзони кои исто така се вклучени во потрагата која повеќе од две недели е без резултат.

Последно, Илија Минов бил виден на 29 март, 2021 година, во 07:30 часот, облечен во зелена јакна, кремаста блуза, сини фармерки, кафеаво шалче со риги и црни кондури.

МИА

ФОТО: gevgelija.gov.mk


Доколку преземете содржина од оваа страница, во целост сте се согласиле со Услови за преземање.