ММС

Објавено на: 02/21/21 2:50 PM

Ќе се порачаат 100.000 вакцини „Спутник“, вели Заев

Премиерот Зоран Заев денеска изјави дека согласно планот за вакцинација и склучените договори, имаме капацитет за да се набават дополнителни 100.000 вакцини, со што би се надополнил севкупниот план за вакцинација. Потврди дека следните дополнителни вакцини ќе бидат од вакцината „Спутник“.

-Во координација со министерот за здравство синоќа добив информација дека имаме капацитет, согласно планот за предвидување, склучените договори и платените аванси, да направиме дополнително и 100.000 дози нарачка од следна вакцина, којашто би го надополнила севкупниот план, а не би предизвикало да останат вишок вакцини согласно планот на Министерството за здравство. Така што да одговорам на прашањето, да, би нарачале од „Спутник“, бидејќи има капацитет од дополнителни 100.000 дози, да се направи порачка и од таму. Се што постои од вакцина, направивме нарачки, договори, рече Заев, одговарајќи на новинарско прашање по посетата на компанијата ТАБМАК во Пробиштип.

Истакна дека оваа недела се очекуваат и првите информации и од Европската Унија, од директниот договор со „Фајзер“, а понатаму преку Ковакс механизмот, а во последната недела од февруари се очекуваат и самите вакцини од Кина, а и планот што е направен за дополнителни нарачки.

-Верувам дека вакцинацијата ќе биде согласно предвидената динамика. Вакцините што ги добивме од Србија се за самите здравствени работници, до вчера беа вакцинирани околу 850 и продолжуваме понатаму. Очекуваме оваа недела да дојдат и останатите вакцини од Србија, кои досега се 4.680, со што ќе се дојде до бројката од 8.000, посочи премиерот.

Тој апелираше да не се повторат случаи со вакцинирање надвор од протоколот како што беше случајот со организацискиот секретар во општата болница во Охрид кој не требало да биде во планот за вакцинација на медициските лица кои работат во Ковид-центрите.


Доколку преземете содржина од оваа страница, во целост сте се согласиле со Услови за преземање.