ММС

Објавено на: 02/19/21 3:22 PM

Филип Миркуловски и Билјана Црвенковска во стручниот штаб на селекторот Кире Лазаров

Новиот селектор на македонската ракометна репрезентација Кирил Лазаров го објави поширокиот список на ракометари за квалификациските дуели со Данска за пласман на Европското првенство во 2022 година.

Лазаров од неодамна е назначен на оваа функција која ќе ја извршува додека игра, односно ќе биде играч-тренер што е вистинска реткост на терените.

Тој избра 35 ракометари на поширокиот список во пресрет на пресметките со Данска, а ги соопшти и членовите на стручниот штаб.

Поранешниот ракометар Филип Миркуловски се враќа во репрезентацијата со двојна улога, како играч и како тренер. Тој ќе треба да му помогне на Кире на теренот и надвор од теренот целосно да се реорганизира националниот тим и да се извлече најдоброто од младите ракометари кои треба да преземат поголема одговорност.

Покрај нив, во стручниот штаб ќе се најдат уште тројца помошници-тренери, бившите репрезентативци Бранислав Ангеловски и Ацо Јоноски, како и поранешната ракометарка Билјана Црвенковска.

Лазаров ќе почне со селекторската кариера на 4 март, а првиот предизвик ќе му биде мечот со Данска на 11 март во Скопје.


Доколку преземете содржина од оваа страница, во целост сте се согласиле со Услови за преземање.