ММС

Објавено на: 02/19/21 10:48 AM

Потпишан Меморандум за соработка со НАТО во полето на сајбер одбраната

Министерката за одбрана Радмила Шекеринска и помошникот генерален секретар на НАТО Дејвид ван Вел, како претседател на Одборот за управување со сајбер одбраната во НАТО, потпишаа Меморандум за разбирање и соработка на полето на сајбер одбраната меѓу Северна Македонија и НАТО.

Овој Меморандум за разбирање има за цел да ја подобри и унапреди соработката и помошта во полето на сајбер одбраната помеѓу НАТО и националните органи за сајбер одбрана.

„Сајбер – безбедноста е област која ја сфаќаме многу сериозно. Меморандумот за соработка со НАТО на полето на сајбер одбраната, овозможува координирана реакција на сојузниците во случај на сајбер напад и е сериозен придонес во зајакнувањето на националните капацитети за справување со сајбер напади, како и во зајакнувањето на отпорноста на Алијансата“, изјави министерката Шекеринска.

„Сајбер одбраната е приоритет за НАТО и неговите сојузници. Зајакнувањето на отпорноста кон растечките сајбер закани е од критично значење, и овој Меморандум за соработка во сајбер одбраната кој го потпишавме со Северна Македонија е важен чекор во таа насока“, рече помошникот генерален секретар Ван Вел.

Меморандумот за разбирање ќе го олесни споделувањето информации за сајбер заканите и најдобрите практики, ќе ја подобри превенцијата на сајбер инциденти и ќе помогне да се зголеми отпорноста на Северна Македонија во поглед на сајбер заканите.

Исто така, Меморандумот за разбирање ќе ја олесни взаемната поддршка на органите задолжени за сајбер одбрана на НАТО и Северна Македонија во случај на потреба.


Доколку преземете содржина од оваа страница, во целост сте се согласиле со Услови за преземање.