ММС

Објавено на: 02/19/21 10:10 AM

Две нови имиња во кошаркарската репрезентација за мечот со Русија

Селекторот на македонската кошаркарска репрезентација, Александар Тодоров направи измени во ростерот за мечот со Русија кој стартува од 15.30 часот во Арената „Молот“ во Перм.

Тодоров се одлучи да и се спротивстави на Русија со следните кошаркари Дамјан Робев, Виктор Ефремовски, Бојан Крстевски, Дамјан Стојановски, Кристијан Николов, Андреј Магдевски, Бојан Трајковски, Филип Бакоч, Џејкоб Вајли, Војдан Стојановски, Ненад Димитријевиќ и Стојан Ѓуроски.

Александар Тодоров не беше незадоволен од крајниот резултат на средбата со Италија вчера, но сепак за него е најважно што овој тим покажа едно сосема поинакво лице во однос на ланскиот февруарски „прозорец“ на ФИБА.

„Покажавме дека можеме да играме против тим кој е прв на ранкингот на ФИБА во моментов. Успеавме не само да бидеме рамноправни, туку и да водиме повеќе од 18 минути од мечот. Покажавме тотално поинакво лице во однос на натпреварите лани.Ова е група која како тим има светла иднина и група на која сум исклучително горд. Ни претстојат уште три натпревари кои ќе бидат многу тешки, но на крајот најверојатно се ќе се сведе на мечот со Естонија в понеделник“.

Тодоров вели дека Димитријевиќ и Вајли би можеле да бидат сериозен тандем, особено што доаѓаат од шпанската лига, макар биле во различни клубови во овој момент.

„Лесно е кога имаш такви кошаркари. Двајцата знаат да играат кошарка и нема проблем да се поврзат заедно. Добро е што имаме уште два меча пред дуелот со Естонија, така што ќе имаат доволно време да се воиграат“- додаде Тодоров.

фото: КФСМ


Доколку преземете содржина од оваа страница, во целост сте се согласиле со Услови за преземање.