ММС

Објавено на: 02/15/21 11:29 AM

Од почетокот на пандемијата вкупно 15 деца заѕвонеле на ѕвончето на хемато-онколошкото одделение дека оздравеле

На Меѓународниот ден посветен на децата кои се борат со канцер – 15 февруари, Министерството за здравство информира дека успешноста на лекување на детските малигноми е над 80% на Клиниката за детски болести. Овој ден, секоја година се одбележува во знак на поддршка на децата со малигни заболувања, за подигнување на свесноста кај јавноста, како и за сите аспекти на нивната борба со болеста.

„Единствената специјализирана педијатриска болница во земјава каде се дијагностицираат и лекуваат деца со малигна болест на возраст до 14 години е Одделот за хематологија и онкологија при Клиниката за детски болести. Оваа установа ја има потребната експертиза, каде се применуваат современи терапевтски протоколи во согласност со препораките на Интернационалната педијатриска асоцијација,“ се вели во соопштението од МЗ

Од почетокот на пандемијата од КОВИД-19 досега, вкупно 15 деца заѕвонеле на ѕвончето на хемато-онколошкото одделение, ритуал кој секое излекувано детенце со неговите родители го прават при напуштање на Клиниката.

И во услови на коронавирус, обезбедена е терапијата во континуитет и ниту една не е одложена. Одобрени се европските и светски протоколи за тестирање на децата за КОВИД пред секое отпочнување на хемо-терапија за да може терапијата да тече безбедно.

Во установата се применуваат сите мерки за заштита од овој вирус препорачани од Комисијата за заразни болести.

Во однос на инфраструктурата, комплетно се реновирани амбулантскиот дел, Ургентниот центар и чекалната на Клиниката за детски болести. Во тек е реновирање и на хемато-онколошкото одделение.

 


Доколку преземете содржина од оваа страница, во целост сте се согласиле со Услови за преземање.