ММС

Објавено на: 02/11/21 9:54 AM

Иницијативен одбор: Закажувањето редовен конгрес на ВМРО-ДПМНЕ во ноември е поигрување со партијата

Обидот на сè уште актуелниот претседател Христијан Мицкоски да го избегне соочувањето со делегатите кои го избраа на 16-от Конгрес, преку закажување на редовен конгрес во Ноември е поигрување со партијата и со сите членови кои ги овластија делегатите во Валандово да му го доверат водството, велат од Иницијативниот одбор во ВМРО-ДПМНЕ.

-Христијан Мицкоски нема капацитет и не ужива доверба меѓу членовите на партијата, а уште помалку меѓу неутралните граѓани. Христијан Мицкоски ќе му донесе уште еден пораз на ВМРО-ДПМНЕ на претстојните локални избори, исто како што донесе порази и на претседателските и на парламентарните избори. Мицкоски успеа да го изгуби и второто место по популарност паѓајќи на трето зад лидерот на Левица, Димитар Апасиев. Политичар со толкав негативен рејтинг не може да очекува победа. ВМРО-ДПМНЕ не може веќе да си дозволи таков луксуз да биде водена од човек кој ја влече надолу и стимулира нови поделби и расправии. На ВМРО-ДПМНЕ и треба сплотеност и решителност во реализација на стратешките цели. На ВМРО-ДПМНЕ и треба вонредниот 17-ти конгрес на кој што ќе се преиспитаат политиките водени од Мицкоски овие три години и ќе се зацртаат насоките во кои партијата ќе се врати на победничките патеки. На ВМРО-ДПМНЕ и треба итна промена за да се влезе со нова енергија на локалните избори, стои во реакцијата.

Тие потенцираат дека сè уште актуелниот претседател Христијан Мицкоски не бил избран од Зоран Заев во Валандово, туку од чесни и искрени членови на партијата кои верувале во неговата агенда и сега истите тие членови кои во партијата имаат поголем стаж од него бараат да им се даде отчет за тоа што лидерот Мицкоски го исполнил од ветеното.

-Тоа не го бара Зоран Заев. Настапите под диктат на Мицкоски со кои се прави обид да се омаловажат делегатите што го избраа, повеќе говорат за неговиот карактер и за тоа во каква беда и расправии ја турка партијата. Навредите дека делегатите кои го избрале се отпадници, покажуваат дека Мицкоски нема никаков респект кон сопартијците кои му верувале и дека е подготвен на најдолна реторика и највалкани игри само за да ја сочува функцијата.  Мицкоски не беше избран на приватна забава и делегатите од конгресот кој го избраа не организираат приватна забава на 28 Март, туку состанок на кој што ќе се расправа и одлучува за најважните прашања кои ја засегаат партијата и државата. ВМРО-ДПМНЕ не е, ниту смее да биде претворена во приватна сопственост на Мицкоски, додаваат од Иницијативниот одбор.

Иницијативниот одбор исто така ги осудува навредите нарачани од страна на  Мицкоски и ги повикува оние делегати кои сè уште се премислуваат да ја видат реалноста и да се соочат со фактот дека Мицкоски нема капацитет да ја води партијата и да победи на избори.

 


Доколку преземете содржина од оваа страница, во целост сте се согласиле со Услови за преземање.