ММС
Банер за Супер7

Објавено на: 07/19/18 8:19 AM

Денеска напладне нова лидерска средба во Клубот на пратеници

Денеска напладне во Клубот на пратеници ќе се одржи нова лидерска средба според барањата на лидерот на ВМРО-ДПМНЕ Христијан Мицкоски, иако не е прецизирано кои партии ќе присуствуваат на средбата.

„Ако Мицкоски е за ЕУ и НАТО требаше да седи рамо до рамо со сите политички партии и да носи одлуки. Но тој наместо тоа одлучи да избега од лидерската средба и да избега од оваа историско прашање. Што е тоа што е спремен Мицкоски да го каже со помал состав? Но, јас сум широк човек и ова прашање е многу важно, дали е за Македонија да биде во НАТО и ЕУ и дали е за тоа граѓаните да одлучуваат за тоа. Затоа закажувам нова лидерска средба според барањата на Мицкоски“, рече премиерот Заев, по завршувањето на вчерашната лидерска средба во проширен состав, која Мицкоски ја напушти зашто не биле поканети сите парламентарни партии.

Тој на средбата дојде со професорката на Правниот факултет, Тања Каракамишева Јовановска, која е член на извршниот комитет на ВМРО-ДПМНЕ.

„ВМРО-ДПМНЕ бара од премиерот Зоран Заев да организира вистинска лидерска средба на четири партии. Најголемата кај Македонците од власта, најголемата кај Албанците од власта, опозициската ВМРО-ДПМНЕ и најголемата опозициска партија кај Албанците“, рече Мицкоски.

ВМРО-ДПМНЕ останува на своите ставови, пред да се разговара за ДИК да се донесат сите реформски закони, кои беа договорени кога партијата се врати по бојкотот во Собранието.

Вчера премиерот Зоран Заев објави како ќе гласи можното референдумско прашање:

„Дали сте за членство во Европската унија и НАТО со прифаќање на договорот за името меѓу Македонија и Грција“.

„Референдумот треба да биде консултативен, а волјата на граѓаните ќе биде конечна за сите политички чинители. Разговаравме и за насоката на која не упатува членот 27 од Законот за референдум, според кој во услови кога Собранието допрва треба да донесе некоја исклучителна важна одлука за иднината потребно е референдумот да биде консултативен со цел граѓаните на Република Македонија да бидат консултирани за вака важно прашање пред да биде донесена одлуката, а согласно договорот со Грција тоа е одлуката за уставни промени“, рече Заев.

Заев рече дека лидерската средба со претставници на сите политички партии ја свикал за сите заедно да одучат и да се обезбеди стабилност, безбедност и просперитет на земјава. Напуштањето на средбата на лидерот на ВМРО-ДПМНЕ Христијан Мицкоски за Заев е несериозно, неодговорно и навредливо однесување.

За барањето на ВМРО-ДПМНЕ за амнестија за обвинетите за организираниот напад на Собранието на 27 април 2017 година, Заев рече дека ниту тој ниту Мицкоски немаат право да амнестираат некого во земја во која законите треба да важат за секого.

На лидерската средба присуствуваа претставници на 11 парламентарни партии.


Доколку преземете содржина од оваа страница, во целост сте се согласиле со Услови за преземање.

Банер за Супер7
1x1