ММС

Објавено на: 12/30/20 2:28 PM

Минатата недела се затворени 13 угостителски објекти, ДПИ и МВР продолжуваат да контролираат и за празниците

На Новогодишната ноќ да се почитуваат мерките и да се празнува одговорно бидејќи надлежните инспекциски служби ќе спроведуваат интензивни контроли на терен, порача денеска претседателката на Инспекцискиот совет Магдалена Филиповска Грашкоска.

Минатата недела седумте инспекторати извршиле 5.200 надзори и контроли.

ДСЗИ во текот на минатата недела извршил 112 надзори врз основа на кои изрекол осум решенија, а издадени се и 6.576 решенија за изолација, што е за една четвртина помалку од претходната недела кога беа издадени повеќе од 9000 решенија за изолација.

– Во истиот период инспекторите од ДПИ извршија 3864 контроли и 462 надзори поврзани со почитувањето на здравствените протоколи. При спроведените надзори изречени се 32 прекршочни пријави, 62 решенија за констатираните неравилности како и 43 прекршочни платни налози. Од вкупниот број на решенијата, 13 се донесени поради непочитување на Законот за заштита на населението од заразни болести и Протоколот за работа на угостителските објекти и тоа за седум угостителски објекти и по два во Гостивар, Тетово и Струга. Во сите овие угостителски објекти не се почитувало работното време или ограничувањето на четири лица на една маса и сите се затворени за работа на лице место, информира Филиповска Грашкоска, потенцирајќи дека бројот на затворени угостителски објекти во текот на минатата недела е зголемен за 50 отсто.

Угостителските објекти ќе бидат „мета“ на ДПИ и МВР во текот на празниците. Грашкоска најави заеднички зајакнати контроли по пријава или по сознание добиено за собири.


Доколку преземете содржина од оваа страница, во целост сте се согласиле со Услови за преземање.