ММС

Објавено на: 11/26/20 3:29 PM

Тезите во интервјуто на Заев предизвикаа тешки последици за македонскиот народ: Бранко Црвенковски го замрзнува своето членство во СДСМ

По повеќе од седум години изолирање од јавноста, поранешниот премиер и претседател на државата, Бранко Црвенковски, се огласи по повод последното интервју на премиерот и претседател на СДСМ, Зоран Заев, за бугарската агенција БГНЕС.

Некогашниот државник јавно го критикуваше Заев за изнесените ставови и тези во последното негово интервју, тези кои според неко предизвикаа и ќе предизвикаат тешки последици за македонскиот народ.

Тој побара од социјалдемократите итно свикување Централниот одбор на партијата и веднаш да се оградат партискиот лидер. Штета барем малку може да се намали, доколку се стави јасно до знаење дека тоа се лични ставови на самиот Заев, а не ставови на Владата или Социјалдемократскиот сојуз на Македонија.

До одржувањето на таква седница на Централниот одбор, Црвенковски го замрзнува членството во партијата.

-Во изминативе 7 години се решив да не бидам на било каков начин присутен во политичката јавност во Македонија. За таквото однесување имав повеќе причини, а во оваа прилика ќе ги споменам двете најголеми. Додека СДСМ беше во опозиција и водеше тешка битка со режимот, не сакав на било кој начин да давам дополнителен повод за напади кон раководството на СДСМ, дека се мои марионети или дека спроведуваат политики под мое влијание. Сакав партијата да биде ослободена од било какво бреме од претходните владеења на СДСМ со државата. Во периодот после формирањето на Владата на чело со СДСМ, не излегов во јавност за да не се доведам во ситуација да се конфронтирам или јавно да критикувам некои политики и постапки на мојата партија. А такви ситуации имаше во повеќе наврати. Таквиот мој став ќе продолжеше и во иднина ако не се случеше скандалозното интервју на Премиерот и Претседател на нашата партија Зоран Заев. Ставовите и тезите искажани во тоа интервју предизвикаа и ќе предизвикуваат тешки и долгорочни последици за македонскиот народ и македонската држава. Направена е огромна и непоправлива штета. Она што може и мора да се направи е да се стави јасно на знаење дека ставовите на Заев не се ниту ставови на целата Влада, ниту на целиот државен врв. Се обраќам до вас почитувани сопартијци за да ви укажам на посебната одговорност што ја има нашата партија. Зоран Заев е претседател на СДСМ и наша е задачата да ја намалиме штетата колку што е можно повеќе.

Ако нема никаква реакција ставовите на Заев ќе станат ставови застапувани од целиот СДСМ, а бидете убедени тоа ќе има катастрофални последици по партијата и што е уште полошо по државата. Реакциите на пооделни видни членови во медиумите и на социјалните мрежи се добредојдени, но не и доволни. Затоа, почитувани мои сопартијци, повикувам под итно да се свика Централниот одбор на партијата и на таа седница да се донесе заклучок дека искажаните ставови на Заев не се ставови ниту на ЦО ниту на СДСМ во целина. Да се реафирмираат уште еднаш ставовите на СДСМ за македонскиот национален идентитет, македонскиот јазик, македонската историја, карактерот на антифашистичката борба и АСНОМ. Почитувањето и спроведувањето на таквите заклучоци да биде задолжително и без релативизрање за секој член на раководството на партијата и секој државен функционер предложен од СДСМ. Почитувани сопартијци, До одржувањето на таква седница на ЦО, јас, Бранко Црвенковски, основач и долгогодишен претседател на СДСМ го замрзнувам моето членство во Социјалдемократскиот сојуз на Македонија, стоеше во соопштението на Бранко Црвенковски.

Тој побара од својата партија да ги реафирмира ставовите за македонскиот национален идентитет, јазик, историја, карактерот на антифашистичката борба и АСНОМ.


Доколку преземете содржина од оваа страница, во целост сте се согласиле со Услови за преземање.