ММС

Објавено на: 11/18/20 11:54 AM

Марио Балотели во Чемпионшип?

Контроверзниот напаѓач, некогаш една од најголемите надежи на италијанскиот фудбал, Марио Балотели, би можел да се врати во англискиот фудбал.

Поранешниот фудбалер на Интер, Милан, Мачестер Сити и Марсеј, на лето остана без клуб откако калчолигашот Бреша му го прекина постоечкиот договор поради непрофесионалниот однос на Балотели и недоаѓањето на тренинг.

По интересот на второлигашот Вотфорд, сега уште едно име од Чемпионшип се поврзува со неговиот потпис. Барнсли е екипата што се надева дека ќе ја заживее поторно кариерата на Италијанецот, а челниците на овој клуб Чиен Ли и Пол Конвеј веќе одржале разговори со неговите претставници.

До овој момент потенцијалниот трансфер на Балотели во Барнсли е „оставен на чекање“, бидејќи освен иницијалните разговори нема друг напредок во преговорите за неговата преселба во Англија.

Некогашниот број еден во нападот на Италија, во моментов тренира со четвртолигашот Франчакорта.


Доколку преземете содржина од оваа страница, во целост сте се согласиле со Услови за преземање.