ММС
Банер за Супер7

Објавено на: 11/6/20 5:29 PM

Извлечена од урнатините по 91 час: Тригодишната Ајда пуштена од интензивна нега

Тригодишното девојче Ајда Ѓезгин кое од под урнатините, по земјотресот во Измир во Турција, беше извлечено по 91 час, го заврши лекувањето на одделот за интензивна нега и е префрлено на Одделот за детска хирургија, пренесува агенцијата Анадолија (АА).

Земјотресот со јачина од 6,6 степени по Рихтер пред седум дена го погоди Измир и соседните региони, а и потоа во тој регион се регистрирани 1.621 потресувања на тлото, од кои 44 беа посилни од четири степени по Рихтер.

Лекувањето на Ајда, која тимовите за трагање и спасување ја спасија од под урнатините, започна на 3 ноември на Одделот за интензивно лекување на Универзитетската детска болница Еге.

Ајда, која вчера ја посети министерот за здравство, Фахретин Коџа, е префрлена во посебна соба на Одделот за детска хирургија на Универзитетската болница Еге во раните утрински часови.

Виталните функции на девојчето се вратија во нормала.

Меѓу спасените од урнатините е и 14 годишната Идил Сирин, која е спасена 58 часа по земјотресот. По спасувањето е утврдено дека е позитивна на Ковид-19 и се наоѓа на лекување.

Хоспитализиран е и понатаму се лекува и Ѓунај Озисик, кој е спасен десет часа по земјотресот кој го погоди Измир на турскиот брег на Егејското море.

Меѓу спасените е и 17 годишната Инџи Окан, која е спасена по 17 часа. Таа го заврши лекувањето на одделот за интензивна нега.

Елиф Перинчек, која е спасена 65 часа по земјотресот, се сретна со својата мајка, браќа и сестри, кои се спасени од земјотресот на 3 ноември.


Доколку преземете содржина од оваа страница, во целост сте се согласиле со Услови за преземање.

Банер за Супер7
1x1